ҚазССР Министрлер Кеңесінің 01.03.1968 жылғы № 119 Қаулысы негізінде 1968 жылдың 1 шілдесінен бастап Шымкент қаласында Шымкент педагогикалық училищесі ашылды. Училище Қазақ КСР Жоғары және орта арнайы білім министрлігінің тікелей қарамағында болған. Шымкент педучилищесі бастауыш сынып мұғалімі және мектепке дейінгі тәрбие мамандықтары бойынша мамандар дайындады. ҚазКСР Министрлер Кеңесінің 21.07.1973 жылғы № 443 өкіміне сәйкес ҚазКСР Жоғары және орта арнаулы білім министрлігінің 04.06.1973 жылғы № 513 бұйрығы негізінде Шымкент педагогикалық училищесі көркемсурет училищесі болып қайта құрылды.
Қаз ССР Жоғары және орта арнаулы білім министрлігінің 17.04.1974 жылғы № 289 бұйрығымен училищеге Ә. Қастеевтің есімі берілді.
Әбілхан Қастеев — қазақ кескіндемешісі және акварелист, қазақстанның халық суретшісі, қазақ бейнелеу өнерінің негізін салушы, Чижин ауылында (қазіргі Алматы облысы) дүниеге келген. 1929-1931 жылдар аралығында Николай Гаврилович Хлудовтың көркем студиясында оқыды. Кейін 1934-1937 жылдар аралығында ол Мәскеуде, Крупская атындағы көркемсурет студиясында оқуын жалғастырды. 1954-1956 жылдары Қазақстан Суретшілер Одағының төрағасы болды. Қазақ КСР Жоғарғы Кеңесінің 4-6-ші шақырылымының депутаты болды.Қазақстан Республикасының Мемлекеттік өнер мұражайы, еліміздің ең ірі көркем мұражайларының бірі Қастеевтің атымен аталған. Оның құрметіне Қазақстанның бірнеше қалаларындағы көшелерге есімі берілді.
Училище көркемсурет саласында мамандар даярлайтын, бүкіл Қазақстан мен Орта Азия аймағы үшін республикадағы екінші оқу орны болып табылады. 1973-1974 оқу жылында «орта мектепте сурет және сызу пәнінің оқытушысы» мамандығы бойынша 20 оқушы 1 курсқа қабылданды.
ҚазКСР Министрлер Кеңесінің 01.03.1974 жылғы № 108 қаулысына сәйкес училище келесі мамандықтар бойынша даярлықты жүргізді:
— суретші-гример
— суретші-бутафор
— суретші-костюмер
— театрлық жарық техникасы
— сахна жабдықтары
— Радиобайланыс және радиохабар тарату
— суретші-безендіруші
1989-1990 оқу жылында сәндік-қолданбалы өнердің металды, ағашты,сүйек пен мүйізді көркемдеп өңдеу бойынша суретші-шебер дайындайтын жаңа мамандықтары ашылды. Училищенің басты міндеттері: жеке адамның интеллектуалдық-мәдени және адамгершілік дамуына деген қажеттіліктерін қанағаттандыру; қоғамның білікті мамандарға әлеуметтік-экономикалық қажеттіліктерін қанағаттандыру; қолданбалы ғылыми зерттеулерді ұйымдастыру және жүргізу; Қазақ халқының және Қазақстанда тұратын басқа да ұлт өкілдерінің мәдениетін, әдет-ғұрпы мен дәстүрлерін зерделеу үшін жағдай жасау болып табылады.
ҚР Білім Министрлігінің 11.12.1995 ж. № 312 бұйрығымен Шымкент көркемсурет училищесі, Ә. Қастеев атындағы Шымкент көркемсурет колледжі болып қайта құрылды. Оңтүстік Қазақстан облысы әкімдігінің 2012 жылғы 23 желтоқсандағы № 426 қаулысымен колледж атауы «Ә. Қастеев атындағы Оңтүстік Қазақстан өнер және дизайн колледжі» болып өзгертілді. » Облыстың қайта ұйымдастырылуына және Шымкентке республикалық маңызы бар қала статусы берілуіне байланысты, Шымкент қаласы әкімдігінің 2018 жылғы 13 қыркүйектегі № 165 Қаулысымен (№1 қосымша) колледж атауы » Ә. Қастеев өнер және дизайн колледжі» болып өзгертілді.
Колледж ұзақ жылдар бойғы қызметінде шығармашылығы республикамызда да, одан тыс жерлерде де кеңінен танымал суретшілерді және дизайнерлерді дайындады. Олар: Асқар Есдәулетов, А. Шалбаев, Саид Атабеков, Амангелді Кенбаев, Зауре Смағұлова, Ержан Құдық, Айнұр Асанова, Ержан Рысымбетов, Серік Рысбеков, Қамбар Көшенов, Қуаныш Құдық, Болат Бейсбеков және т.б. Колледж түлектері арасында КСРО және ҚР Суретшілер Одағының, ҚР дизайнерлер мен сәулетшілер одағының мүшелері, түрлі республикалық және халықаралық көрмелердің лауреаттары мен дипломанттары және беделді шығармашылық конкурстардың лауреаттары көп.
Колледж ұжымында Алматы, Астана, Ташкент және Белоруссияның жоғары оқу орындарының түлектері табысты жұмыс істейді. Олар жоғары кәсіби деңгейде сабақ береді.
Колледждің білім беру қызметіндегі 47 жыл ішінде мәдениет, өнер және дизайн саласында, біздің елде және шетелде жұмыс істейтін 4,5 мыңға жуық түлекті оқытып шығарды.